بحبك

وانا بالف بين المدونات كعادتى اليومية قابلنى بوست رائع عند غادة لما قريته حسيت انها بتوصف حالتى بالضبط انا كمان لما ربنا يسرليا الأرتباط بأعز انسانة عندى فى الدنيا حسيت انى مش قادر أكتب أى حاجه عنها يمكن لأن الفرحه كانت أكبر بكتير من قدرتى أنى أوصفها بكلامى قولت يمكن بعد الخطوبه أكتب عنها ما قدرتيش
قولت يمكن بعد كتب الكتاب و كتبنا الكتاب و برضه ما قدرتش .
وخلاص فاضل ايام ونبقى مع بعض فى بيت واحد وبرضه شايف ان ما فيش كلام يقدر يتقال يوصف الى انا حاسه
لغاية ما قريت بوست غادة ولقيت انى مش لواحدى .
حبيبتى
ما فيش كلام فى الدنيا يوصفك ويوصف احساسى بيكى
ياريتنى كنت رسام وانا كنت رسمتك احلى من اى حد رسم فى يوم حبيبته
ياريتنى كنت شاعر وانا كنت كتبت فيكى قصيدة احلى من اى قصيدة كتبها واحد عن حبيبته
ياريت كنت باعرف اقولك او اعملك اى حاجه تقولك اد ايه باحبك
ما فيش غير كلمة واحده باقولهالك وهيا خارجه فعلاً من قلبى خارجه ومعاها كل تعب وعذاب و حزن السنين الطويلة الى عدت عليا وانتى بعيدة عنى
كلمة واحده هيا ...
بحبك
بحبك يا قلبى وروحى وعمرى
بحبك يا مراتى و حياتى وعمرى الى فات وما عشتهوش علشان كنت بعيدة عنى
بحبك يا عمرى الى جاى كله
بحبك يا أحلى حاجه حصلت فى عمرى كله
بحبك ... بحبك... بحبك